ဒုဋ္ဌုလ္လဝါစာသိက္ခာပုဒ်

၃-ဒုဋ္ဌုလ္လဝါစာသိက္ခာပုဒ်

၂၈၃။ ဘုန်းတော်ကြီးရေ မြတ်စွာဘုရားစွာ သာဝတ္ထိမြို့ အနာထပိဏ်သူဌေးဧ့ အရံဖြိုက်ရေဇေတဝန်ကျောင်းမာ သီတင်းသုံးနိန်တော်မူရေ အခါ အသျှင်ဥဒါယီစွာ တောမာ နိန်ဧ့၊ ထိုအသျှင်ဧ့ကျောင်းစွာ ကကောင်းလှပဧ့၊ ရှုချင်ဖွယ်ကောင်းဧ့။ စိတ်ကို ကြည်လင်စီတတ်ဧ့၊ ယင်းခါကျောင်းကြေ့လိုကုန်ရေ မိမအများကြီးရို့စွာ အရံတွင်းသို့ လာကက်ကုန်ဧ့၊ ယပြီးနောက်ထိုမိမရို့စွာ အသျှင်ဥဒါယီထံသို့ ချဉ်းကပ်ကက်ပြီးကေ အသျှင်ဥဒါယီအား 'အသျှင်ဘုရား တပည့်တော်ရို့မစွာ အသျှင်ဧ့ ကျောင်းကို ကြေ့ရှုလိုကတ်ပါကုန်ရေ'လို့ လျှောက်ထားကက်ကုန်ဧ့၊ ယင်းခါ အသျှင်ဥဒါယီစွာ ထိုမိမ ရို့အား ကျောင်းကို ကြေ့ရှုစီပြီးကေ ထိုမိမရို့ဧ့ဝစ္စမဂ် ပဿဝမဂ်ကို ရည်ရွယ်ပြီးကေ ကျေးဇူးကိုလည်း ပြောဆိုဧ့၊ ကျေးဇူးမဲ့ကိုလည်း ပြောဆိုဧ့၊ တောင်းလည်း တောင်းဧ့၊ ထပ်ကာ ထပ်ကာလည်း တောင်းဧ့၊ မီးလည်း မီးဧ့၊ ပြန်ပြီးကေလည်းမီးဧ့၊ ပြောလည်း ပြောဧ့၊ ဆုံးမလည်း ဆုံးမဧ့၊ ဆဲရီး လည်း ဆဲရီးဧ့၊ အကြင် မိမရို့စွာကြောက်လန့်ခြင်း 'ဩတ္တပ္ပ'မှ ကင်းကုန်ဧ့၊ စဉ်းလဲရေ သဘော ဟိကက်ကုန်ဧ့၊ အရှက်မှ ကင်းကုန်ဧ့၊ ထိုမိမရို့စွာ အသျှင်ဥဒါယီနန့် အတူ ပြုံးလည်း ပြုံး ကုန်ဧ့၊ မြှောက်ပင့်ပြီးကေလည်း ပြောဆိုကုန်ဧ့၊ ပြင်းစွာလည်း ရယ်မောကုန်ဧ့၊ ပြောင်လှောင်လည်း ပြောင် လှောင်ကုန်ဧ့။

အကြင် မိမရို့စွာကား ရှက်ကြောက်တတ်ရေ စိတ်ဟိကုန်ဧ့၊ ထို မိမရို့စွာ ထွက်လား ကုန်ပြီးကေ'အသျှင်ဘုရားရို့ ဒေ (ဥဒါယီဧ့) ပြောဆိုရေ စကားစွာ၊ မလျှောက်ပတ်ပါ၊ မသင့်တင့်ပါ။ တပည့်တော်မရို့စွာ အသျှင်သခင် လင်ယောက်ျားက အေပိုင် ပြောဆိုအပ်စော်တောင် အလိုမဟိကတ်ပါကုန်၊ အသျှင်ဥဒါယီက ပြောဆိုအပ်ပါမူကား အဇာမှာ အလိုဟိကတ်ပါကုန်ဖို့လဲ'လို့ ရဟန်းရို့ကို သရော်စီကုန်ဧ့ 'တိုင်ကြားကုန်ဧ့'။

အလိုနည်းပါးရေ ရဟန်းရို့စွာ 'အသျှင်ဥဒါယီစွာ မိမကို ရုန့်ရင်းကြမ်းတမ်းရေ စကားရို့နန့် အဇာကြောင့် ပြက်ရယ်ပြောဆိုဘိသနည်း'လို့ သရော်ကုန်ဧ့၊ ရှုတ်ချကုန်ဧ့၊ အပြစ်ပြပြောဆိုကက် ကုန်ဧ့၊ ယပြီးနောက် ထိုရဟန်းရို့စွာ အသျှင်ဥဒါယီကို အများကြီးရေ အကြောင်းနန့်သရော်ပြစ်တင်ကက် ပြီးကေ မြတ်စွာဘုရားအား ဒေအကြောင်းကို လျှောက်ထားကက်ကုန်ဧ့၊ ယင်းခါမြတ်စွာဘုရားစွာ ဒေအကြောင်းအရာကြောင့် ရဟန်းသံဃာကို စည်းဝီးစီပြီးကေ အသျှင်ဥဒါယီကို-

'ဥဒါယီ သင်စွာ မိမကို ရုန့်ရင်းကြမ်းတမ်းရေ စကားရို့နန့် ပြက်ရယ်ပြောဆိုဧ့ဆိုစွာ မှန်သလော'လို့ စိစစ် မီးမြန်းတော်မူဧ့။

မှန်ပါရေ မြတ်စွာဘုရားလို့ (လျောက်ဧ့)။

ဘုန်းတော်ကြီးရေ မြတ်စွာဘုရားစွာ သရော်တော်မူဧ့၊ '(မဂ်ဖိုလ်မှ) အချည်းနှီးဖြိုက်ရေ ယောက်ျား (ဒေအလုပ်အမူစွာ) ရဟန်းရို့အား မလျှောက်ပတ်၊ မလျှော်ကန်၊ မသင့်တင့်၊ ရဟန်းရို့အလုပ် အမူမဟုတ်၊ မအပ်၊ မလုပ်သင့်။ (မဂ်ဖိုလ်မှ) အချည်းနှီးဖြိုက်ရေ ယောက်ျား အဇာကြောင့် သင်စွာ မိမကိုရုန့်ရင်း ကြမ်းတမ်းရေ စကားရို့နန့် ပြက်ရယ်ပြောဆိုဘိသလဲ။ (မဂ်ဖိုလ်မှ) အချည်းနှီး ဖြိုက်ရေယောက်ျား ငါစွာ အများကြီးရေ အကြောင်းနန့် ရာဂနန့်တကွ ဖြစ်ခြင်းငှါ တရားတော်ကိုဟောတော်မမူဘဲ ရာဂကင်းရန် ဟောတော်မူစွာ မဟုတ်ပါလော။ပ။

ကာမဂုဏ် အပူအအိုက်ရို့ဧ့ ငြိမ်းအီးမှုကို ဟောတော်မူစွာ မဟုတ်ပါလော၊ (မဂ်ဖိုလ်မှ) အချည်းနှီးဖြိုက်ရေ ယောက်ျား ဒေ (သင်လုပ်မိရေအမှု) စွာ မကြည်ညိုသီးရေ သူရို့အား ကြည်ညိုစီခြင်းငှါလည်းကောင်း။ပ။

ရဟန်းရို့ အေပိုင်လျင် ဒေသိက္ခာပုဒ်တော်ကို ပြကက်ကုန်ဖိ။

ပညတ်သိက္ခာပုဒ်နန့် သိက္ခာပုဒ်အဖွင့်

၂၈၄။ 'အကြင် ရဟန်းစွာ ရာဂဘီလူးပူးဝင်အပ်စွာ ဖြစ်ပြီးကေ ဖောက်ပြန် ရေ စိတ်နန့်မိမကို ရုန့်ရင်းကြမ်းတမ်းရေ စကားရို့နန့် လုလင်ပျိုစွာ မိမပျိုကို မေထုန်နန့် စပ်ရေစကားရို့နန့် ပြက်ရယ်ပြောဆိုသပိုင် ပြက်ရယ် ပြောဆိုငြားအံ့၊ ထိုရဟန်းအား သံဃာဒိသိသ်အာပတ်သင့်ဧ့' အေပိုင် (ပြကက်ကုန်ဖိလို့ မိန့်တော်မူဧ့)။

၃-ဒုဋ္ဌုလ္လဝါစာသိက္ခာပုဒ်အဖွင့်

၂၈၅။ အကြင်ဆိုစွာ အကြင်သို့ သဘောဟိရေ။ပ။

ရဟန်းဆိုရေပ။ ဒေအရာမာ ဒေဉတ္တိစတုတ္ထကံနန့် ရဟန်းအဖြစ်သို့ ရောက်သူကို 'ရဟန်း'လို့အလိုဟိအပ်ဧ့။

ရာဂဘီလူးပူးဝင်အပ်စွာဖြစ်ပြီးကေ ဆိုစော် ကကောင်းတပ်မက်စွာ ဖြစ်ပြီးကေ ငဲ့ကွက်ခြင်းဟိစွာ ဖြစ်ပြီးကေဖွဲ့နှောင် ရစ်ပတ်အပ်တေ စိတ်ဟိစွာဖြစ်ပြီးကေ။

ဖောက်ပြန်ဆိုစွာ တပ်မက်ရေ စိတ်စော်လည်း ဖောက်ပြန်စွာ မည်ဧ့။ အမျက်ထွက်ရေစိတ်စော်လည်း ဖောက်ပြန်စွာ မည်ဧ့။ တွီဝေရေ စိတ်စော်လည်း ဖောက်ပြန်စွာ မည်ဧ့။ ယေကေလဲ တပ်မက်ရေ စိတ်ကို ဒေအရာမာ 'ဖောက်ပြန်'လို့ အလိုဟိအပ်ဧ့။

မိမ ဆိုစော် လူမိမတဲး၊ ဘီလူး (နတ်) မ မဟုတ်၊ ပြိတ္တာမ မဟုတ်၊ တိရစ္ဆာန်မ မဟုတ်၊ ကောင်း မကောင်း, ရုန့်ရင်း မရုန့်ရင်းရေ စကားကို သိနားလည်နိုင်စွမ်းရေ မိမတဲး။

ရုန့်ရင်းကြမ်းတမ်းရေစကား ဆိုစော် ဝစ္စမဂ် ပဿာဝမဂ် မေထုန်နန့်စပ်ရေ စကားတဲး။

ပြက်ရယ်ပြောဆိုငြားအံ့ဆိုစွာ လွန်ကက်ူးမှုကို ဆိုဧ့။

လုလင်ပျိုစွာ မိမပျိုကိုပိုင်ဆိုစွာ သူငယ်စွာ သူငယ်မကို လုလင်ပျိုစွာ အပျိုကို ကာမဂုဏ်ခံစားသူစော် ကာမဂုဏ်ခံစားရေ မိမကို။

မေထုန်နန့်စပ်ရေ စကားရို့နန့်ဆိုစွာ မေထုန်နန့်ယှဉ်ရေ စကားတိနန့်။

သံဃာဒိသိသ်ဆိုရေပ။ ယင်းချင့်ကြောင့်လည်း 'သံဃာဒိသိသ်'လို့ ဆိုအပ်ဧ့။

ခေါင်းစိုင်မာတိကာ

ဝစ္စမဂ် ပဿာဝမဂ် နှစ်ခုတိကို ရည်ရွယ်ပြီးကေ ကျေးဇူးကိုလည်း ပြောဆိုဧ့၊ ကျေးဇူးမဲ့ကိုလည်း ပြောဆိုဧ့၊ တောင်းလည်း တောင်းဧ့၊ ထပ်ကာ ထပ်ကာလည်း တောင်းဧ့၊ မီးလည်း မီးဧ့၊ ပြန်ပြီးကေလည်းမီးဧ့၊ ပြောလည်း ပြောဧ့၊ ဆုံးမလည်း ဆုံးမဧ့၊ ဆဲရီးလည်း ဆဲရီးဧ့။

မာတိကာအဖွင့်

ဂုဏ်ကျေးဇူးကိုပြောဆိုဧ့ ဆိုစော် ဝစ္စမဂ် ပဿာဝမဂ် နှစ်ခုတိကို မြှောက်ပင့်ဧ့၊ ကျေးဇူးကို ဆိုဧ့၊ ချီးမွမ်းဧ့၊

ကျေးဇူးမဲ့ကိုပြောဆိုဧ့ ဆိုစော် ဝစ္စမဂ် ပဿာဝမဂ် နှစ်ခုတိကို ဆဲရီးဧ့၊ ရှုတ်ချဧ့၊ သရော်ဧ့။

တောင်းဧ့ ဆိုစော် ငါ့အား ပီးဗလင်၊ ငါ့အား ပီးထိုက်ဧ့လို့ (ဆိုဧ့)။

ထပ်ကာ ထပ်ကာတောင်းဧ့ ဆိုစော် ဇာအခါမာ သင်ဧ့ မိခင်စွာ သထာလိမ့်ဖို့လဲ၊ ဇာအခါမာ သင်ဧ့ ဖခင်စွာ သထာလိမ့်ဖို့လဲ၊ ဇာအခါမာ သင်ဧ့ နတ်ရို့စွာ သထာလိမ့်ဖို့လဲ၊ ဇာအခါမာ အချိန်ကောင်း အခါကောင်း အခွင့်ကောင်း ဖြစ်လိမ့်ဖို့လဲ၊ ဇာအခါမာ့သင်ဧ့ မေထုန်အကျင့်ကို ရအံ့နည်းလို့ (ဆိုဧ့)။

မီးဧ့ ဆိုစော် သင်စွာ လင်ကြီးအား ဇာပိုင် ပီးသနည်း၊ သင်စွာ လင်ငယ်အား ဇာပိုင် ပီးသနည်းလို့ (ဆိုဧ့)။

ပြန်ပြီးကေ မီးဧ့ ဆိုစော် သင်စွာ လင်ကြီးအား အေပိုင် ပီးသလော၊ သင်စွာ လင်ငယ်အား အေပိုင်ပီးသလောလို့ (ဆိုဧ့)။

ပြောဧ့ ဆိုစော် မီးအပ်စွာ ဖြစ်ပြီးကေ 'အေပိုင် ပီးဗလင်၊ အေပိုင် ပီးရေ မိမကို လင်ယောက်ျားစွာ ချစ်ခင်မြတ်နိုးလီဖို့'လို့ (ပြောဆိုဧ့)။

ဆုံးမဧ့ ဆိုစော် မမီးဘဲ 'အေပိုင်ပီးဗလင်၊ အေပိုင်ပီးရေ မိမကို လင်ယောက်ျားစွာချစ်ခင်မြတ်နိုးလီဖို့'လို့ (ပြောဆိုဧ့)။

ဆဲရီးဧ့ ဆိုစော် သင့်မှာ မိမနိမိတ် မဟိ၊ မိမနိမိတ်ရာမျှ ဟိဧ့၊ သွီးမယို 'ရာ သီ မလာ'၊ သွီး အမြဲယိုဧ့၊ အမြဲ ပိတ်ဆို့အပ်တေ အဝတ်ဟိဧ့၊ ယိုစီးနိန်ဧ့၊ အသားစွန်းရှည်ဧ့၊ မိမပဏ္ဍုက်ဖြစ်ဧ့၊ ယောက်ျားလျာ ဖြစ်ဧ့၊ မဂ်နှစ်ရပ် ဆက်စပ်နိန်ဧ့၊ ဥဘတောဗျည်း 'လိင်နှစ်ခုဟိသူ' ဖြစ်ဧ့လို့ဆိုဧ့။

၂၈၆။ မိမလည်းဟုတ်ဧ့၊ မိမလို့ ထင်မှတ်ပြီးကေ တပ်မက်ရေ စိတ်လည်း ဟိဧ့၊ ရဟန်းစွာ လည်း မိမဧ့ ထိုဝစ္စမဂ် ပဿာဝမဂ်ကို ရည်ရွယ်ပြီးကေ ကျေးဇူးကိုလည်း ပြောဆိုအံ့၊ ကျေးဇူးမဲ့ကိုလည်းပြောဆိုအံ့၊ တောင်းလည်း တောင်းအံ့၊ ထပ်ကာ ထပ်ကာလည်း တောင်းအံ့၊ မီးလည်း မီးအံ့၊ ပြန်ပြီးကေလည်း မီးအံ့၊ ပြောလည်း ပြောအံ့၊ ဆုံးမလည်း ဆုံးမအံ့၊ ဆဲရီးလည်း ဆဲရီးအံ့၊ သံဃာဒိသိသ်အာပတ် သင့်ဧ့။ပ။

မိမနှစ်ယောက်ရို့လည်းဟုတ်ကုန်ဧ့၊ မိမနှစ်ယောက်ရို့မာ မိမလို့ ထင်မှတ်ပြီးကေ တပ်မက်ရေစိတ်လည်း ဟိဧ့၊ ရဟန်းစွာ လည်း မိမနှစ်ယောက်ရို့ဧ့ ထိုဝစ္စမဂ် ပဿာဝမဂ်တိကို ရည်ရွယ် ပြီးကေကျေးဇူးကိုလည်း ပြောဆိုအံ့၊ ကျေးဇူးမဲ့ကိုလည်း ပြောဆိုအံ့။ပ။ ဆဲရီးလည်း ဆဲရီးအံ့၊ သံဃာဒိသိသ်အာပတ် နှစ်ချက်သင့်ဧ့။ပ။

မိမလည်းကောင်း၊ ပဏ္ဍုက်လည်းကောင်းဟုတ်ဧ့၊ နှစ်ယောက်လုံးရို့မာ မိမလို့ ထင်မှတ်ပြီးကေတပ်မက်ရေ စိတ်လည်း ဟိဧ့၊ ရဟန်းစွာ လည်း နှစ်ယောက်လုံးရို့ဧ့ ထိုဝစ္စမဂ် ပဿာဝမဂ်ကိုရည်ရွယ်ပြီးကေ ကျေးဇူးကိုလည်း ပြောဆိုအံ့၊ ကျေးဇူးမဲ့ကိုလည်း ပြောဆိုအံ့။ပ။ ဆဲရီးလည်း ဆဲရီးအံ့၊ သံဃာဒိသိသ်နန့် ဒုက္ကဋ်အာပတ် သင့်ဧ့။ပ။

မိမလည်းဟုတ်ဧ့၊ မိမလို့ ထင်မှတ်ပြီးကေ တပ်မက်ရေ စိတ်လည်း ဟိဧ့၊ ရဟန်းစွာ လည်း မိမဧ့ထိုဝစ္စမဂ် ပဿာဝမဂ်ကို ချန်ထားပြီးကေ ညှပ်ရိုးနှစ်ဖက်အောက် ပုဆစ်ဒူးဝန်းအထက်ကို ရည်ရွယ်ပနာ ကျေဇူးကိုလည်း ပြောဆိုအံ့၊ ကျေးဇူးမဲ့ကိုလည်း ပြောဆိုအံ့။ပ။ ဆဲရီးလည်း ဆဲရီးအံ့၊ ထုလ္လစ္စဉ်းအာပတ် သင့်ဧ့။ပ။

မိမနှစ်ယောက်ရို့လည်းဟုတ်ကုန်ဧ့၊ မိမနှစ်ယောက်ရို့မာ မိမလို့ ထင်မှတ်ပြီးကေ တပ်မက် ရေစိတ်လည်း ဟိဧ့၊ ရဟန်းစွာ လည်း မိမနှစ်ယောက်ရို့ဧ့ ထိုဝစ္စမဂ် ပဿာဝမဂ်ကို ချန်ထားပြီးကေညှပ်ရိုးနှစ်ဖက်အောက် ပုဆစ်ဒူးဝန်းအထက်ကို ရည်ရွယ်ပနာ ကျေးဇူးကိုလည်း ပြောဆိုအံ့၊ ကျေးဇူးမဲ့ကိုလည်း ပြောဆိုအံ့။ပ။ ဆဲရီးလည်း ဆဲရီးအံ့၊ ထုလ္လစ္စဉ်းအာပတ် နှစ်ချက်သင့်ဧ့။ပ။

မိမလည်းကောင်း၊ ပဏ္ဍုက်လည်းကောင်းဟုတ်ဧ့၊ နှစ်ယောက်လုံးရို့မာ မိမလို့ ထင်မှတ်ပြီးကေတပ်မက်ရေ စိတ်လည်း ဟိဧ့၊ ရဟန်းစွာ လည်း နှစ်ယောက်လုံးရို့ဧ့ ထိုဝစ္စမဂ် ပဿာဝမဂ်ကိုချန်ထားပြီးကေ ညှပ်ရိုးနှစ်ဖက်အောက် ပုဆစ်ဒူးဝန်းအထက်ကို ရည်ရွယ်ပနာ ကျေးဇူးကိုလည်း ပြောဆိုအံ့၊ ကျေးဇူးမဲ့ကိုလည်း ပြောဆိုအံ့။ပ။ ဆဲရီးလည်း ဆဲရီးအံ့၊ ထုလ္လစ္စဉ်းနန့် ဒုက္ကဋ်အာပတ် သင့်ဧ့။ပ။

မိမလည်းဟုတ်ဧ့၊ မိမလို့ ထင်မှတ်ပြီးကေ တပ်မက်ရေ စိတ်လည်း ဟိဧ့၊ ရဟန်းစွာ လည်းမိမဧ့ ထိုညှပ်ရိုးနှစ်ဖက်အထက် ပုဆစ်ဒူးဝန်းအောက်ကို ရည်ရွယ်ပြီးကေ ကျေးဇူးကိုလည်း ပြောဆိုအံ့၊ ကျေးဇူးမဲ့ကိုလည်း ပြောဆိုအံ့။ပ။ ဆဲရီးလည်း ဆဲရီးအံ့၊ ဒုက္ကဋ်အာပတ် သင့်ဧ့။ပ။

မိမနှစ်ယောက်ရို့လည်းဟုတ်ကုန်ဧ့၊ မိမနှစ်ယောက်ရို့မာ မိမလို့ ထင်မှတ်ပြီးကေ တပ်မက်ရေစိတ်လည်းဟိဧ့၊ ရဟန်းစွာ လည်း မိမနှစ်ယောက်ရို့ဧ့ ထိုညှပ်ရိုးနှစ်ဖက်အထက် ပုဆစ်ဒူးဝန်းအောက်ကို ရည်ရွယ်ပြီးကေ ကျေးဇူးကိုလည်း ပြောဆိုအံ့၊ ကျေးဇူးမဲ့ကိုလည်း ပြောဆိုအံ့။ပ။ ဆဲရီးလည်းဆဲရီးအံ့၊ ဒုက္ကဋ်အာပတ် နှစ်ချက်သင့်ဧ့။ပ။

မိမလည်းကောင်း၊ ပဏ္ဍုက်လည်းကောင်းဟုတ်ဧ့၊ နှစ်ယောက်လုံးရို့မာ မိမလို့ ထင်မှတ်ပြီးကေတပ်မက်ရေ စိတ်လည်း ဟိဧ့၊ ရဟန်းစွာ လည်း နှစ်ယောက်လုံးရို့ဧ့ ထိုညှပ်ရိုးနှစ်ဖက်အထက်ပုဆစ်ဒူးဝန်းအောက်ကို ရည်ရွယ်ပြီးကေ ကျေးဇူးကိုလည်း ပြောဆိုအံ့၊ ကျေးဇူးမဲ့ကိုလည်း ပြောဆိုအံ့။ပ။ ဆဲရီးလည်း ဆဲရီးအံ့၊ ဒုက္ကဋ်အာပတ် နှစ်ချက်သင့်ဧ့။ပ။

မိမလည်းဟုတ်ဧ့၊ မိမလို့ ထင်မှတ်ပြီးကေ တပ်မက်ရေ စိတ်လည်း ဟိဧ့၊ ရဟန်းစွာ လည်းမိမဧ့ ထိုကိုယ်နန့်စပ်ရေ အရာဝထုကို ရည်ရွယ်ပြီးကေ ကျေးဇူးကိုလည်း ပြောဆိုအံ့၊ ကျေးဇူးမဲ့ကိုလည်းပြောဆိုအံ့။ပ။ ဆဲရီးလည်း ဆဲရီးအံ့၊ ဒုက္ကဋ်အာပတ် သင့်ဧ့။ပ။

မိမနှစ်ယောက်ရို့လည်းဟုတ်ကုန်ဧ့၊ မိမနှစ်ယောက်ရို့မာ မိမလို့ ထင်မှတ်ပြီးကေ တပ်မက်ရေစိတ်လည်း ဟိဧ့၊ ရဟန်းစွာ လည်း မိမနှစ်ယောက်ရို့ဧ့ ထိုကိုယ်နန့်စပ်ရေ အရာတ္ထုကိုရည်ရွယ်ပြီးကေ ကျေးဇူးကိုလည်း ပြောဆိုအံ့၊ ကျေးဇူးမဲ့ကိုလည်း ပြောဆိုအံ့။ပ။ ဆဲရီးလည်း ဆဲရီးအံ့၊ ဒုက္ကဋ် အာပတ် နှစ်ချက်သင့်ဧ့။ပ။

မိမလည်းကောင်း၊ ပဏ္ဍုက်လည်းကောင်းဟုတ်ဧ့၊ နှစ်ယောက်လုံးရို့မာ မိမလို့ ထင်မှတ်ပြီးကေတပ်မက်ရေ စိတ်လည်း ဟိဧ့၊ ရဟန်းစွာ လည်း နှစ်ယောက်လုံးရို့ဧ့ ထိုကိုယ်နန့်စပ်ရေ အရာဝထုကို ရည်ရွယ်ပြီးကေ ကျေးဇူးကိုလည်း ပြောဆိုအံ့၊ ကျေးဇူးမဲ့ကိုလည်း ပြောဆိုအံ့။ပ။ ဆဲရီးလည်းဆဲရီးအံ့၊ ဒုက္ကဋ် အာပတ် နှစ်ချက် သင့်ဧ့။ပ။

၂၈၇။ အနက်ကို ရှေ့လားလုပ်ရေ ရဟန်း၊ ပါဠိကို ရှေ့လားလုပ်ရေ ရဟန်း၊ ဆုံးမမှုကို ရှေ့လားလုပ်ရေ ရဟန်း၊ ရူးရေ ရဟန်း၊ အစလက်ဦး လွန်ကျူးရေ ရဟန်းအား အာပတ် မသင့်။

၃-ဒုဋ္ဌုလ္လဝါစာသိက္ခာပုဒ်အဖွင့် ပြီးဧ့။

ဝိနီတဝထု ခေါင်းစိုင်မာတိကာ

နီရေ၊ ထူထဲရေ၊ ယူပ်ထွီးရေ၊ ကြမ်းတမ်းရေ၊ ရှည်ရေ၊ စိုက်အပ်ပြီလော၊ ခရီးတိုဧ့လော၊ သဒ္ဓါတရားဟိဧ့၊ ပီးလှူခြင်း၊ အမှုကိစ္စ၊ ဒေကား ခေါင်းစဉ် မာတိကာတဲး။

ဝိနီတဝထု ဖြတ်ထုံးတိ

၂၈၈။ အယင်ခေါက်ကခါ မိမတစ်ယောက်စွာ ဆိုးသစ်စ ကမ္ဗလာကို ခြုံနိန်ဧ့၊ ရဟန်းတစ်ပါးစွာတပ်မက်ရေ စိတ်ဟိပြီးကေ ထိုမိမကို 'နှမ သင့် ဥစ္စာစွာ နီဧ့'လို့ ပြောဆိုဧ့၊ ထိုမိမစွာ (ဆိုလိုရင်းကို) မသိပြီးကေ မှန်ပါရေ အသျှင်ဘုရား၊ ကမ္ဗလာစွာ ဆိုးပြီးစ ဖြစ်ပါရေလို့ (လျှောက်ဧ့)။

ထိုရဟန်းအား 'ငါစွာ သံဃာဒိသိသ်အာပတ် သင့်လီသလော'လို့ တွီးတောမှု 'သံသယကုက္ကုစ္စ'ဖြစ်ဧ့။ မြတ်စွာဘုရားအား ဒေအကြောင်းကို လျှောက်ထားဧ့။ ရဟန်း သံဃာဒိသိသ်အာပတ် မသင့်၊ ဒုက္ကဋ်အာပတ် သင့်ဧ့လို့ (မိန့်တော်မူဧ့)။ (၁)

အယင်ခေါက်ကခါ မိမတစ်ယောက်စွာ ကြမ်းတမ်းရေ ကမ္ဗလာကို ခြုံနိန်ဧ့၊ ရဟန်းတစ်ပါးရေတပ်မက်ရေ စိတ်ဟိပြီးကေ ထိုမိမကို 'နှမ သင့် ဥစ္စာစွာ အမွီးထူဧ့'လို့ ပြောဆိုဧ့၊ ထိုမိမစွာ (ဆိုလိုရင်းကို) မသိပြီးကေ မှန်ပါရေ အသျှင်ဘုရား၊ ကြမ်းတမ်းရေ ကမ္ဗလာ ဖြစ်ပါရေလို့ (လျှောက်ဧ့)။

ထိုရဟန်းအား တွီးတောမှု 'သံသယကုက္ကုစ္စ' ဖြစ်ဧ့။ပ။ ရဟန်း သံဃာဒိသိသ်အာပတ် မသင့်၊ ဒုက္ကဋ်အာပတ် သင့်ဧ့လို့ (မိန့်တော်မူဧ့)။ (၂)

အယင်ခေါက်ကခါ မိမတစ်ယောက်စွာ ရက်ပြီးစ ကမ္ဗလာကို ခြုံနိန်ဧ့၊ ရဟန်းတစ်ပါးစွာတပ်မက်ရေ စိတ်ဟိပြီးကေ ထိုမိမကို 'နှမ သင့် ဥစ္စာစွာ အမွီးရှုပ်ဧ့'လို့ ပြောဆိုဧ့၊ ထိုမိမစွာ (ဆိုလိုရင်းကို) မသိပြီးကေ မှန်ပါရေ အသျှင်ဘုရား၊ ရက်ပြီးစ ကမ္ဗလာဖြစ်ပါရေလို့ (လျှောက်ဧ့)။

ထိုရဟန်းအား တွီးတောမှု 'သံသယကုက္ကုစ္စ' ဖြစ်ဧ့။ပ။ ရဟန်း သံဃာဒိသိသ်အာပတ် မသင့်၊ ဒုက္ကဋ်အာပတ် သင့်ဧ့လို့ (မိန့်တော်မူဧ့)။ (၃)

အယင်ခေါက်ကခါ မိမတစ်ယောက်စွာ ကြမ်းတမ်းရေ ကမ္ဗလာကို ခြုံနိန်ဧ့၊ ရဟန်းတစ်ပါးစွာတပ်မက်ရေ စိတ်ဟိပြီးကေ ထိုမိမကို 'နှမ သင့် ဥစ္စာစွာ အမွီးကြမ်းဧ့'လို့ ပြောဆိုဧ့၊ ထိုမိမစွာ (ဆိုလိုရင်းကို) မသိပြီးကေ မှန်ပါရေ အသျှင်ဘုရား၊ ကြမ်းတမ်းရေ ကမ္ဗလာဖြစ်ပါရေလို့ (လျှောက်ဧ့)။

ထိုရဟန်းအား တွီးတောမှု 'သံသယကုက္ကုစ္စ' ဖြစ်ဧ့။ပ။ ရဟန်း သံဃာဒိသိသ်အာပတ် မသင့်၊ ဒုက္ကဋ်အာပတ် သင့်ဧ့လို့ (မိန့်တော်မူဧ့)။ (၄)

အယင်ခေါက်ကခါ မိမတစ်ယောက်စွာ ပဝါကို ခြုံနိန်ဧ့၊ ရဟန်းတစ်ပါးစွာ တပ်မက်ရေ စိတ်ဟိပြီးကေထိုမိမကို 'နှမ သင့် ဥစ္စာစွာ အမွီးရှည်ဧ့'လို့ ပြောဆိုဧ့၊ ထိုမိမစွာ (ဆိုလိုရင်းကို) မသိပြီးကေမှန်ပါရေ အသျှင်ဘုရား၊ ပဝါ ဖြစ်ပါရေလို့ (လျှောက်ဧ့)။

ထိုရဟန်းအား တွီးတောမှု 'သံသယကုက္ကုစ္စ' ဖြစ်ဧ့။ပ။ ရဟန်း သံဃာဒိသိသ်အာပတ် မသင့်၊ ဒုက္ကဋ်အာပတ် သင့်ဧ့လို့ (မိန့်တော်မူဧ့)။ (၅)

၂၈၉။ အယင်ခေါက်ကခါ မိမတစ်ယောက်စွာ လယ်ကို စိုက်ပျိုးစီပြီးပြီးကေ ပြန်လာဧ့၊ ရဟန်းတစ်ပါးစွာ တပ်မက်ရေ စိတ်ဟိပြီးကေ ထိုမိမကို 'နှမ သင့် ဥစ္စာကို စိုက်အပ်ပြီလော'လို့ ပြောဆိုဧ့၊ ထိုမိမစွာ (ဆိုလိုရင်းကို) မသိပြီးကေ မှန်ပါရေ အသျှင်ဘုရား၊ စိုက်ပျိုးမပြီးသီးပါလို့ (လျှောက်ဧ့)။

ထိုရဟန်းအား တွီးတောမှု 'သံသယကုက္ကုစ္စ' ဖြစ်ဧ့။ပ။ ရဟန်း သံဃာဒိသိသ်အာပတ် မသင့်၊ ဒုက္ကဋ်အာပတ် သင့်ဧ့လို့ (မိန့်တော်မူဧ့)။ (၆)

အယင်ခေါက်ကခါ ရဟန်းတစ်ပါးစွာ ခရီးရင်ဆိုင်မာ ပရိဗိုဇ်မကိုမြင်ပြီးကေ တပ်မက်ရေ စိတ်ဟိအနိန်နန့် ထိုပရိဗိုဇ်မကို 'နှမ လမ်းတိုဧ့လော'လို့ ပြောဆိုဧ့၊ ပရိဗိုဇ်မစွာ (ဆိုလိုရင်းကို) မသိပြီးကေ မှန်ပါရေရဟန်း၊ လားရလိမ့်ဖို့လို့ (လျှောက်ဧ့)။

ထိုရဟန်းအား တွီးတောမှု 'သံသယကုက္ကုစ္စ' ဖြစ်ဧ့။ပ။ ရဟန်း သံဃာဒိသိသ်အာပတ် မသင့်၊ ထုလ္လစ္စဉ်းအာပတ် သင့်ဧ့လို့ (မိန့်တော်မူဧ့)။ (၇)

အယင်ခေါက်ကခါ ရဟန်းတစ်ပါးစွာ တပ်မက်ရေ စိတ်ဟိပြီးကေ မိမတစ်ယောက်ကို 'နှမ သင်စွာသဒ္ဓါတရား ဟိဧ့၊ ယေကေလဲ သင်စွာ လင်ယောက်ျားအား ပီးရေ အရာဝထုကို ငါ့ရို့အားမပီးလှူ'လို့ ပြောဆိုဧ့။

ဇာ အရာဝထုပါလဲ အသျှင်ဘုရားလို့ (လျှောက်ဧ့)။

မေထုန်အကျင့်တဲးလို့ ပြောဆိုဧ့၊ ထိုရဟန်းအား တွီးတောမှု 'သံသယကုက္ကုစ္စ' ဖြစ်ဧ့။ပ။ ရဟန်းသင်စွာ သံဃာဒိသိသ်အာပတ် သင့်ပြီလို့ (မိန့်တော်မူဧ့)။ (၈)

အယင်ခေါက်ကခါ ရဟန်းတစ်ပါး စွာ တပ်မက်ရေစိတ်ဟိပြီးကေ မိမတစ်ယောက်ကို 'နှမ သင်ရေသဒ္ဓါတရား ဟိဧ့၊ ယေကေလဲ အမြတ်ဆုံး အလှူကို ငါ့ရို့အား မပီးလှူ'လို့ ပြောဆိုဧ့။

အသျှင်ဘုရား အမြတ်ဆုံး အလှူဆိုစွာ ဇာအရာပါလဲလို့ (လျှောက်ဧ့)။

မေထုန်အကျင့်တဲးလို့ ပြောဆိုဧ့၊ ထိုရဟန်းအား တွီးတောမှု 'သံသယကုက္ကုစ္စ' ဖြစ်ဧ့။ပ။ ရဟန်းသင်စွာ သံဃာဒိသိသ်အာပတ် သင့်ပြီလို့ (မိန့်တော်မူဧ့)။ (၉)

အယင်ခေါက်ကခါ မိမတစ်ယောက်စွာ အလုပ်ကိစ္စကို လုပ်နိန်ဧ့၊ ရဟန်းတစ်ပါးစွာ တပ်မက် ရေစိတ်ဟိပြီးကေ ထိုမိမကို 'နှမ ရပ်ဦး၊ ငါ လုပ်မေ။ပ။ နှမ ထိုင်ဦး၊ ငါ လုပ်မေ။ပ။ နှမ အိပ်ဦး၊ ငါ လုပ်မေ'လို့ ပြောဆိုဧ့။

ထိုမိမစွာ (ဆိုလိုရင်းကို) မသိ၊ ထိုရဟန်းအား တွီးတောမှု 'သံသယကုက္ကုစ္စ' ဖြစ်ဧ့။ပ။ ရဟန်းသံဃာဒိသိသ်အာပတ် မသင့်၊ ဒုက္ကဋ်အာပတ် သင့်ဧ့လို့ (မိန့်တော်မူဧ့)။ (၁၀-၁၂)

တတိယ ဒုဋ္ဌုလ္လဝါစာ သိက္ခာပုဒ် ပြီးဧ့။