အန်ဒရေ ဖရက်ဒရစ် ကော်နန်

နိုဘယ်ဆုရ ဆီးပညာရှင် အန်ဒရေ ဖရက်ဒရစ် ကော်နန်ကို ၁၈၉၈ ခုနှစ် စတ်တင်ဘာလ ၂၄ ရက်နိမာ ပြင်သစ်နိုင်ငံ ပါရီမြို့မာ မွီးဖွားရေ။ ငယ်စဉ်က ဘောလုံးချန်ပီယံလေ့ဖြစ်တေအပြင် ခြီကျင်တောင်တက် အားကစပ်ကိုလေ့ အထူးပင်ဝါသနာထုံခရေ။ ပထမကမ္ဘာစစ်မာ ပြင်သစ်စစ်သားတဦးအဖြစ် ရွပ်ရွပ်ချွံချွံပါဝင်ဆင်နွဲခလို့ သူရဲကောင်းမှတ်တမ်းဝင် ကြယ်သုံးပွင့်ဆု ချီးမြှင့်ခံရရေ။

ကော်နန်စွာ ၁၉၃ဝ ပြည့်နှစ်မာ ပါရီတက္ကသိုလ်မှ ဆီးပညာဘွဲ့ ဆွတ်ခူးပြီးကေ အမေရိကန် ပြည်ထောင်စုသို့ ပြောင်းရွီ့နီထိုင်ရေ။ ကိုလံဘီယာတက္ကသိုလ် ဆီးကောလိပ်မာ စာပီပို့ချခရေ။ ဒစ်ကင်ဆန်ဒဗလျူရစ်ချတ်(၁၈၉၅-၁၉၇၃) နန့် လက်တွဲပြီးကေ အဆုတ်နန့်နှလုံးဆိုင်ရာ ကုထုံးသုတေသနကို ပြုလုပ် ရေ။ ကော်နန်စွာ ၁၉၅၁ ခုနှစ်မှ ၁၉၆၄ ခုနှစ်ထိ ဆီးပညာပါမောက္ခအဖြစ် ဆောင်ရွက်ခပြီးကေ နောက် ၁၉၆၄ ခုနှစ်မာ ဂုဏ်ထူးဆောင် ပါမောက္ခကြီးဖြစ်လာရေ။

ကော်နန်စွာ ဗာရနာဖွစမန်း (၁၉ဝ၄-၁၉၇၉)တွိဟိထားပြီးသား နည်းကို ပိုပြီးကေပြည့်စုံစီရန် ရစ် ချတ်နန့်အတူလေ့လာဖြည့်ဆည်းနီစဉ် ရောဂါဖိစီးနိန်ရေ လူ့နှလုံး၏သဘောသဘာဝကို ပင်ဖြစ်ဖြစ်၊ အခြီခံကျသော ခန္ဓာကိုယ် ချွတ်ယွင်းဖောက်ပြန်မှုကို တိကျစွာ ရှာဖွီနှိုင်ရေနည်းကိုလေ့သော့ ဖော်ထုတ် ပီးနှိုင်ခရေ။ ခုန်နီတုန်းလူ့နှလုံး၏ အခန်းတခန်းထဲကို ချူပြွန်၏ တဖက်စွန်းကို သွင်းကာသွီးနမူနာထုတ်ယူပနာ ယင်းသွီးထဲမာ အောက်ဆီဂျင်ပါဝင်မှု ပမာဏကိုကောက်ချက်ချနှိုင်ရေ နည်းလမ်းကို တိုးတက် ကောင်းမွန်အောင် ဖြည့်ဆည်းပီးခခြင်းပင်ဖြစ်တေ။

ကော်နန်စွာ ၁၉၄၉ ခုနှစ်မာ အမေရိကန် ပြည်သူ့ကျန်းမာရီးအဖွဲ့ချုပ်၏ လက်စကာဆီးပညာဆုကို ဆွတ်ခူးရေ။ ယင်းအပြင် ရစ်ချတ်နန့် ဖွစမန်းရို့နန့်အတူ ၁၉၅၆ ခုနှစ်မာ ဆီးပညာနန့် ဇီဝကမ္မ ဗေဒဆိုင်ရာ နိုဘယ်ဆုကို ရဟိရေ။ နှလုံးရောဂါကုထုံး ဖွံ့ဖြိုးတိုးတက်ရီးအတွက် ကြိုးပမ်းခရေ ပြင်သစ်နိုင်ငံဖွား အမေရိကန် ဆီးပညာရှင် အန်ဒရီးဖရက်ဒရစ် ကော်နန်စွာ ၁၉၈၈ ခုနှစ် မာ့ခ်ျလမာ အမေရိကန်ပြည်ထောင်စု မက်ဆာချူးဆက်ပြည်နယ် ဂရိတ်ဘာရင်တန်မြို့မာ ကွယ်လွန်ရေ။