အာဋာနာဋိယသုတ်

အာဋာနာဋိယသုတ် စွာ ဒီဃနိကာယ်ဧ့ (၃၂) ခုမြောက်သုတ်ဖြစ်ပြီးကေ ဂိဇ္ဈကုဋ်တောင်မာ ဟောကြားခရေ။ ဒေသုတ်စွာ ဘုရားမြတ်စွာကို မကြည်ညိုမမြတ်နိုးရေ နတ်တိ၊ ဂန္ဓဗ္ဗတိ၊ ယက္ခများစွာ ဘုရားမြတ်စွာဧ့ ဥပါသကာနန့် ဥပါသိကာရို့အား ဂရုတ်ဂယှုတ်ပီးခကေ ဇာပိုင်ဇာပုံ ချွတ်လွှဲရဖို့အကြောင်း ညွှန်ပြသောသုတ်ဖြစ်ရေ။

မြတ်စွာဘုရားလက်ထက်တော်အခါက သာသနာတော်ကို မသက်ဝင် မယုံကြေကြတေ၊ သီလစောင့်သူရို့ဧ့ ဘုန်းကံကို မခံနိုင်ရေ ဘီလူး မိစ္ဆာတိက သာသနာ့အနွယ်ဝင် ပရိသတ်လေးပါးဖြစ်တေ ရဟန်း၊ ရဟန်းအစ်မ၊ သာသနာ့ ဒါယကာ၊ သာသနာ့ ဒါယိကာမရို့ကို ဖမ်းဆီးနှောင့်ယှက်ကက်လီရေ။ ထို မိစ္ဆာဘီလူးတိ ယိုင်ကျေးလားရာ သာသနာတော်တွင် သက်ဝင်ယုံကြေလာစီဖို့ အာဋာနာဋိယသုတ် ရွတ်ဆိုစီရေ။

အာဋာနာဋိယသုတ်

၁။ အပ္ပသန္နေဟိ နာထဿ၊ သာသနေ သာဓုသမ္မတေ။အမနုဿေဟိ စဏ္ဍေဟိ၊ သဒါ ကိဗ္ဗိသ ကာရိဘိ။

၁။ သူတော်ကောင်းအပေါင်းက ကောင်းပါလီရေဟု လက်ခံချီးကျူးထားရေ မြတ်စွာဘုရားဧ့သာသနာတော်ကိုပင် မကြည်ညိုမသက်ဝင်နိုင်ကက်တေ လဆိုး ဘီလူးရို့စွာ ရက်စက်တတ်ကက်ကုန်ဧ့။ ဇာအခါမဆို နိုင်ထက်စီးနင်း နှိပ်ထက်ကလူ ပြုတတ်ကက်ဧ့။

၂။ ပရိသာနံ စတဿန္နံ၊ အဟိံ သာယစ ဂုတ္တိယာ။ယံ ဒေသေသိ မဟာဝီရော၊ ပရိတ္တံ တံ ဘဏာမ ဟေ။

၂။ ထိုဘီလူး လဆိုးရို့က ပရိသတ်ကို မညှင်းဆဲ မနှိပ်စက်နိုင်စီဖို့နန့် သူရို့ကပင် ကူညီစောင့်ရှောက်လာစီဖို့ ရည်ရွယ်ချက်နန့် ကြီးမြတ်ရေလုံ့လဟိတော်မူကေ မြတ်စွာဘုရားက ဒေအာဋာနာဋိယ ပရိတ်တော်အရံအတားကို ဟောကြားတော်မူခခြင်းဖြစ်လီရေ။ အဂုအခါမာ ဒေပရိတ်တော်ကို ကျွန်ုပ်ရို့ စုပေါင်းပြီးကေ ရွတ်ဆိုကတ်ပါမေ။

၃။ ဝိပဿိဿ စ နမတ္ထု၊ စက္ခုမန္တဿ သိရီမတော၊သိခိဿပိ စ နမတ္ထု၊ သဗ္ဗဘူတာနုကမ္ပိနော။

၃။ စက္ခု ငါးပါးနန့်ပြည့်စုံတော်မူရေ ဘုန်းကျက်သရေနန့်ပြည့်စုံတော်မူရေ ဝိပဿီမြတ်စွာဘုရားအား အကျွန်ုပ်ဧ့ဦးညွှတ်ယှိခိုးခြင်းဖြစ်ပါစီ။ သတ္တဝါ အားနူံးအပေါ် ကြင်နာသနားမှုနန့် အစိုင်သနား စောင့်ရှောက်တော်မူရေ သိခီမြတ်စွာဘုရားအားလည်း အကျွန်ုပ်ဧ့ ဦးညွှတ်ယှိခိုးမှုဖြစ်ပါစီ။

၄။ ဝေဿဘုဿ စ နမတ္ထု၊ နှာတကဿ တပဿိနော။နမတ္ထု ကကုသန္ဓဿ၊ မာရသေနာ ပမဒ္ဒိနော။

၄။ မကောင်းမှု အညစ်အကြေးကို ဆေးကြောသန့်စင်ပြီးဖြစ်တေ ခြိုးခြံရေ အကျင့်ကိုလည်း ကျင့်တော်မူရေ ဝေဿဘူမြတ်စွာဘုရားအားလည်း အကျွန်ုပ်ယှိခိုးပါဧ့။ မာရ်စစ်သည် အပေါင်းကို နှိမ်နှင်းအောင်မြင်တော်မူရေ ကကုသန်မြတ်စွာဘုရားအားလည်း အကျွန်ုပ် ယှိခိုးပါဧ့။

၅။ ကောဏာဂမနဿ နမတ္ထု၊ ဗြာဟ္မဏဿ ဝုသီမတော။ကဿပဿ စ နမတ္ထု၊ ဝိပ္ပိမုတ္တဿ သဗ္ဗဓိ။

၅။ မကောင်းမှု ဟူသမျှပယ်အပ်ပြုပြီးရေ ငါးပါးသောဝသီဘော်နန့် ပြည့်စုံတော်မူရေ ကောဏာဂုံမြတ်စွာဘုရားအားလည်း အကျွန်ုပ်ယှိခိုးပါဧ့။ ခပ်သိမ်းသောကိလေသာရို့မှ လွတ်ကင်းတော်မူပြီးရေ ကဿပမြတ်စွာဘုရားအားလည်း အကျွန်ုပ်ဧ့ ဦးညွှတ် ယှိခိုးခြင်းဖြစ်ပါစီ။

၆။ အင်္ဂီရသဿ နမတ္ထု၊ သကျပုတ္တဿ သိရီမတော။ယော ဣမံ ဓမ္မံ ဒေသေသိ၊ သဗ္ဗဒုက္ခာ ပနူဒနံ။

၆။ လူရို့ဧ့ ဆင်းရဲဒုက္ခဟူသမျှကို ပယ်ဖျောက်နိုင်စွမ်းဟိရေ တရားတော်မြတ်ကို ဟောကြားတော်မူပေဧ့။ ကိုယ်တော်မှလည်း အရောင်အဝါကွန့်မြူးဖြာယှက် ထွက်တော်မူဧ့။ ဘုန်းကျက်သရေနန့်လည်း ပြည့်စုံတော်မူပေဧ့။ သကျသာကီဝင်မင်းသားလည်း ဖြစ်တော်မူဧ့။ ထိုဂေါတမမြတ်စွာဘုရားအား အကျွန်ုပ်ဧ့ ဦးညွှတ်ယှိခိုးခြင်းစွာ ဖြစ်ပါစီသတဲး။

၇။ ယေ စာပိ နိဗ္ဗုတာ လောကေ၊ ယထာဘူတံ ဝိပဿိသုံ။တေ ဇနာ အပိသုဏာထ၊ မဟန္တာ ဝီတသာရဒါ။

၇။ လောကမာ ငြိမ်းအီးကုန်ပြီးရေ ဘုရားသျှင်အဆူဆူရို့စွာ ယထာဘူတကျကျသိကုန်ဧ့။ ချောပစ်ကုန်းတိုက်တေ စကားမျိုးကို ဇာအခါမျှ ဆိုမိန့်တော်မမူ၊ ကြီးလည်းကြီးမြတ်ကုန်ဧ့။ ကြောက်ရွံ့ခြင်းလည်း ကင်းကုန်ဧ့။

၈။ ဟိတံ ဒေဝမနုဿနံ၊ ယံ နမဿန္တိ ဂေါတမံ။ဝိဇ္ဇာစရဏသမ္ပန္နံ၊ မဟန္တံ ဝီတသာရဒံ။

၈။ ဝိဇ္ဇာသုံးပါး၊ ဝိဇ္ဇာရှစ်ပါး၊ စရဏတဆယ့်ငါးပါးရို့နန့် ပြည့်စုံတော်မူပြီးကေ မြတ်လှစွာသော ရဲရင့်ခြင်းအတိ ဟိတော်မူရေ နတ်လူရို့ဧ့ အစီးအပွားကိုဆောင်တော်မူတတ်တေ ဂေါတမနွယ်ဖွား သျှင်တော်မြတ်ဘုရားကို ဟိခိုးဦးညွှတ်ကတ်ပါကုန်ဧ့။

၉။ ဧတေ စညေ စ သမ္ဗုဒ္ဓါ၊ အနေကသတ ကောဋိယော။သဗ္ဗေဗုဒ္ဓါ သမသမာ၊ သဗ္ဗေဗုဒ္ဓါ မဟိဒ္ဓိကာ။

၉။ ဝိပဿီ၊ သိခီ၊ ဝေဿဘူ ၊ ကကုသန်၊ ကောဏာဂုံ၊ ကဿပ၊ ဂေါတမ ဆိုရေ ဘုရားခုနှစ်ဆူရို့နန့်တကွ အကုဋေမကများလှစွာသော ဘုရားသျှင်အားနူံးရို့စွာ ပစ္စေကဗုဒ္ဓါရဟန္တာတိနန့် တူတော်မမူကုန်။ ဆိုခပါ သဗ္ဗညူ ဘုရားသျှင်ချင်းသာ တူတော်မူကြကုန်ဧ့။ ဘုရားသျှင်အားနူံးပင် တန်ခိုးဣဒ္ဓိ လွန်စွာကြီးမားကြကုန်ဧ့။

၁၀။ သဗ္ဗေ ဒသဗလူပေတာ၊ ဝေသာရဇ္ဇေဟု ပါဂတာ။သဗ္ဗေ တေ ပဋိဇာနန္တိ၊ အာသဘံ ဌာနမုတ္တမံ။

၁ဝ။ ခပ်သိမ်းကုန်ရေ ဘုရားသျှင်ရို့စွာ အားတော်ဆယ်ပါးနန့် ပြည့်စုံတော်မူဧ့။ ရဲရင့်ရေ ဝေသာရဇ္ဇဉာဏ်နန့် ပြည့်စုံတော်မူကက်ဧ့။ မြတ်တေယောက်ျား ဥသဘဖြစ်တော်မူပြီးကေ သဗ္ဗညုတဉာဏ်ကို ရဟိကြောင်း ဝန်ခံကက်ကုန်ဧ့။

၁၁။ သီဟနာဒံ နဒန္တေတေ၊ ပရိသာသု ဝိသာရဒါ။ဗြဟ္မစက္ကံ ပဝတ္တေန္တိ၊ လောကေ အပ္ပဋိဝတ္တိယံ။

၁၁။ ဘုရားသျှင်ရို့စွာ ဇာ ပရိသတ်ဗိုလ်ပုံအလယ်မာမဆို လွန်စွာရဲရင့်တော်မူကြဧ့။ ကေသရာဇာခြင်္သေ့မင်းပိုင် ရဲရဲရင့်ရင့်စကားဆိုကြဧ့။ ဇာသူ တဦးတယောက်မျှ မလည်မပတ်စီနိုင်ရေ ဓမ္မစကြာတရားတော်ကိုလည်း လည်ပတ်စီကုန်ဧ့။ (ဟောကြားကုန်ဧ့။)

၁၂။ ဥပေတာ ဗုဒ္ဓဓမ္မေဟိ၊ အဋ္ဌာရသဟိ နာယကာ။ဗာတ္တိံသ လက္ခဏူပေတာ၊ သီတာနု ဗျဉ္ဇနာဓရာ။

၁၂။ ဘုရားသျှင်ရို့စွာ လူသုံးပါးရို့ဧ့ ခရီးလမ်းညွှန် ဖြိုက်ကက်ဧ့။ ဘုရားဧ့ကျေးဇူးတရား (၁၈) ပါးနန့်ပြည့်စုံကက်ကုန်ဧ့။ (၃၂) ပါးသော ယောက်ျားမြတ်ရို့ဧ့လက္ခဏာတော်ကြီးရို့နန့်လည်း ပြည့်စုံတော်မူကြဧ့။ လက္ခဏာတော်ငယ် (၈ဝ) ရို့နန့်လည်း ပြည့်စုံတော်မူကြဧ့။

၁၃။ ဗျာမပ္ပဘာယ သုပ္ပဘာ၊ သဗ္ဗေ တေ မုနိကုဉ္ဇရာ၊ဗုဒ္ဓါ သဗ္ဗညုနော ဧတေ၊ သဗ္ဗေ ခီဏာသဝါ ဇိနာ။

၁၃။ ဘုရားသျှင်ဟူသမျှ ကိုယ်တော်အလုံးမှ တလံမျှလောက်ရောင်ခြည်တော် အမြဲထွက်ပနာဟိဧ့။ ရဟန်းဟူသမျှရို့ထက် ကြီးမြတ်ဧ့။ ခပ်သိမ်းသောတရားကိုလည်း သိဧ့။ ကိလေသာအာသဝေါလည်း ကင်းဧ့။ မာရ်ငါးပါးကိုလည်း အောင်ပြီးဖြစ်ဧ့။

၁၄။ မဟာပဘာ မဟာတေဇာ၊ မဟာပညာ မဟဗ္ဗလာ။မဟာကရုဏိကာ ဓီရာ၊ သဗ္ဗေသာနံ သုခါဝဟာ။

၁၄။ ဘုရားသျှင်ရို့စွာ အများကြီးရေ ရောင်ခြည်တော်၊ ကြီးသောတန်ခိုး၊ ထွတ်မြတ်ရေပညာ၊ စွမ်းသန်ရေ ခွန်အား၊ အတိုင်းမသိရေ ကရုဏာ၊ စွဲမြဲရေလုံ့လတိကို ပိုင်တော်မူကြဧ့။ သတ္တဝါအများကောင်းကျိုးချမ်းသာကိုလည်း ဆောင်တော်မူတတ်ကက်ကုန်ဧ့။

၁၅။ ဒီပါ နာထာ ပတိဋ္ဌာ စ၊ တာဏာ လေဏာ စ ပါဏိနံ။ဂတီ ဗန္ဓူ မဟေဿာသာ၊ သရဏာ စ ဟိတေသိနော။

၁၅။ မြတ်စွာဘုရားသျှင်ရို့စွာ သတ္တဝါအပေါင်းရို့ဧ့ မှီခိုရာကျွန်းလည်း ဖြစ်ဧ့။ ကိုးကွယ်ရာလည်းဖြစ်ဧ့။ တည်ရာလည်းဖြစ်ဧ့။ စောင့်ရှောက်ရာလည်းဖြစ်ဧ့။ ဘေးအန္တရာယ်မှ ပုန်းကွယ်ရာလည်းဖြစ်ဧ့။ လာရောက်ရာလည်း ဖြစ်ဧ့။ ဆွေမျိုးသဖွယ်လည်းဖြစ်ဧ့။

၁၆။ သဒေဝကဿ လောကဿ၊ သဗ္ဗေ ဧတေ ပရာယဏာ။တေသာ ဟံ သိရသာ ပါဒေ၊ ဝန္ဒာမိ ပုရိသုတ္တမေ။

၁၆။ ထိုဘုရားသျှင်တိုင်းစွာ နတ်ရို့ဧ့ လှဲရာ၊ လူရို့ဧ့ မှီခိုရာ ဖြိုက်ကက်ကုန်ဧ့။ အကျွန်ုပ်စွာ ယောက်ျားဟူသမျှရို့ထက် သာလွန်မြင့်မြတ်တော်မူရေ ထိုဘုရားသျှင်ရို့ဧ့ ခြေတော်တိကို ဦးနှိမ် ရိုကျိုး ယှိခိုးပါဧ့။

၁၇။ ဝစသာ မနသာ စေဝ၊ ဝန္ဒာမေ’ တေ တထာဂတေ။သယနေ အာသနေ ဌာနေ၊ ဂမနေ စာပိ သဗ္ဗဒါ။

၁၇။ အကျွန်ုပ်စွာ အိပ်နိန်ရေအခါမာဖြိုက်စီ၊ ထိုင်နိန်ရေအခါမာဖြိုက်စီ၊ ရပ်နိန်ရေအခါမာဖြိုက်စီ၊ လမ်းလားနိန်ရေအခါမာဖြိုက်စီ၊ ဇာအခါမာမဆို ထိုဘုရားသျှင်ရို့အား နှုတ်နန့်လည်းကောင်း စိတ်နန့်လည်းကောင်း အမြဲမပြတ် ယှိခိုးပါဧ့။

၁၈။ သဒါ သုခေန ရက္ခန္တု၊ ဗုဒ္ဓါ သန္တိကရာ တုဝံ။တေဟိ တွံ ရက္ခိတော သန္တော၊ မုတ္တော သဗ္ဗဘယေဟိ စ။

၁၈။ ကိလေသာအပူအပေါင်းကိုငြိမ်းအီးအောင် ပြုတော်မူတတ်ကက်ကုန်ရေ ဘုရားသျှင်ရို့စွာ သင့်ကို ချမ်းသာအောင် မပြတ်စောင့်ရှောက်ပါစီသတဲး။ ဘုရားသျှင်ရို့ဧ့ အစောင့်အရှောက်ကိုခံယူရရေ သင်စွာ ငြိမ်သက်ချမ်းမြီ့ပါစီ။ ဘေးအန္တရာယ်ခပ်သိမ်းမှ ကင်းလွတ်ပါစီ။

၁၉။ သဗ္ဗရောဂါ ဝိနီမုတ္တော၊ သဗ္ဗသန္တာပ ဝဇ္ဇိတော။သဗ္ဗဝေရ မတိက္ကန္တော၊ နိဗ္ဗုတော စ တုဝံ ဘဝ။

၁၉။ သင်စွာ အနာမဟိ ပကတိကျန်းမာသူ၊ ပူပန်ခြင်း ကင်းသူ၊ ရန်သူဟူသမျှကို လွတ်မြောက်နိုင်သူ၊ ငြိမ်းအီးချမ်းမြီ့သူ ဖြစ်ပါစီသတဲး။

၂၀။ တေသံ သစ္စေန သီလေန၊ ခန္တီမေတ္တာ ဗလေန စ။တေပိ အမှေ နုရက္ခန္တု၊ အရောဂေန သုခေန စ။

၂ဝ။ ထိုဘုရားသျှင်ရို့စွာ သီလ၊ သစ္စာ၊ ခန္တီ၊ မေတ္တာရို့ဧ့ စွမ်းပကားနန့် ကျွန်ုပ်တိကို အနာမဟိ ပကတိချမ်းသာအောင် အစိုင်အနိန်နန့် စောင့်ရှောက်ကတ်ပါစီကုန်သတဲး။

၂၁။ ပုရတ္ထိမသ္မိံ ဒိသာဘာဂေ၊ သန္တိဘူတာ မဟိဒ္ဓိကာ။တေပိ အမှေ နုရက္ခန္တု၊ အရောဂေန သုခေန စ။

၂၁။ အရှိမျက်နှာအရပ်မာ တန်ခိုးကြီးရေ ဂန္ဓဗ္ဗနတ်ရို့ ဟိကက်ကုန်ဧ့။ ထိုနတ်ရို့စွာ ကျွန်ုပ်ရို့ကို အနာမဟိ ပကတိချမ်းသာအောင် အစိုင်တစိုက် စောင့်ရှောက်ကတ်ပါစီကုန်သတဲး။

၂၂။ ဒက္ခိဏသ္မိံ ဒိသာဘာဂေ၊ သန္တိဒေဝါ မဟိဒ္ဓိကာ။တေပိ အမှေ နုရက္ခန္တု အရောဂေန သုခေန စ။

၂၂။ တောင်ဘက်အရပ်မျက်နှာမာ တန်ခိုးကြီးရေ ကုမ္ဘဏ်နတ်ရို့ ဟိကက်ကုန်ဧ့။ ထိုနတ်ရို့စွာလည်း ကျွန်ုပ်တိကို အနာမဟိ ပကတိချမ်းသာအောင် အစိုင်အနိန်နန့် စောင့်ရှောက်ကတ်ပါစီကုန်သတဲး။

၂၃။ ပစ္ဆိမသ္မိံ ဒိသာဘာဂေ၊ သန္တိ နာဂါ မဟိဒ္ဓိကာ။တေပိ အမှေ နုရက္ခန္တု၊ အရောဂေန သုခေန စ။

၂၃။ အနောက်အရပ်မျက်နှာမာ တန်ခိုးကြီးရေ နဂါးရို့ဟိကက်ကုန်ဧ့။ ထိုနဂါးရို့စွာလည်း ကျွန်ုပ်တိကို အနာမဟိ ပကတိချမ်းသာအောင် အစိုင်စောင့်ရှောက်ကတ်ပါစီကုန်သတဲး။

၂၄။ ဥတ္တရသ္မိံ ဒိသာဘာဂေ၊ သန္တိ ယက္ခာ မဟိဒ္ဓိကာ။တေပိ အမှေ နုရက္ခန္တု၊ အရောဂေန သုခေန စ။

၂၄။ မြောက်ဘက်အရပ်မျက်နှာမာ တန်ခိုးကြီးသောဘီလူးရို့စွာ ဟိကက်ကုန်ဧ့။ ထိုဘီလူးရို့စွာလည်း ကျွန်ုပ်ရို့ကို အစိုင်အနိန်နန့် စောင့်ရှောက်ကတ်ပါစီကုန်သတဲး။

၂၅။ ပုရတ္ထိမေန ဓတရဋ္ဌော၊ ဒက္ခိဏေန ဝိရူဠှကော။ပစ္ဆိမေန ဝိရူပက္ခော၊ ကုဝေရော ဥတ္တရံ ဒိသံ။

၂၅။ အရှိအရပ်မျက်နှာမာ ဂန္ဓဗ္ဗနတ်ရို့ကို အစိုးရရေ ဓတရဋ္ဌနတ်မင်း၊ တောင်အရပ်မျက်နှာမာ ကုမ္ဘဏ်နတ်ရို့ကို အစိုးရရေ ဝိရူဠကနတ်မင်း၊ အနောက်အရပ်မျက်နှာမာ နဂါးတိကိုအစိုးရရေ ဝိရူပက္ခ နတ်မင်း၊ မြီာက်အရပ်မျက်နှာမာ ဘီလူးတိကို အစိုးရရေ ကုဝေရနတ်မင်း။

၂၆။ စတ္တာရော တေ မဟာရာဇာ၊ လောကပါလာ ယသဿိနော။တေပိ အမှေ’ နုရက္ခန္တု၊ အရောဂေန သုခေန စ။

၂၆။ ထိုနတ်မင်းကြီးလေးပါးရို့စွာ လူတိကို စောင့်ရှောက်တတ်ကက်ကုန်ဧ့။ အခြွီအရံလည်းများကုန်ဧ့။ ထိုနတ်မင်းကြီးရို့စွာ ကျွန်ုပ်တိကို အနာမဟိ ပကတိချမ်းသာအောင် အစိုင်မပြတ် စောင့်ရှောက်ကတ်ပါစီကုန်သတဲး။

၂၇။ အာကာသဋ္ဌာ စ ဘူမဋ္ဌာ၊ ဒေဝါ နာဂါ မဟိဒ္ဓိကာ။တေပိ အမှေ’ နုရက္ခန္တု၊ အရောဂေန သုခေန စ။

၂၇။ ကောင်းကင်မာတည်သော နတ်များ၊ မြီမာတည်သော နတ်များ၊ နဂါးများစွာ တန်ခိုးကကောင်းစူးကတ်ရေ။ ထိုတန်ခိုးကြီးနတ်၊ နဂါးရို့စွာ ကျွန်ုပ်တိကို အနာမဟိ ပကတိချမ်းသာအောင် အစိုင်မပြတ် စောင့်ရှောက်ကတ်ပါစီကုန်သတဲး။

၂၈။ ဣဒ္ဓိမန္တော စ ယေ ဒေဝါ၊ ဝသန္တာ ဣဓ သာသနေ။ တေပိ အမှေ နုရက္ခန္တု၊ အရောဂေန သုခေန စ။

၂၈။ တန်ခိုးကြီးရေနတ်ရို့စွာ ဒေဘုရားသာသနာတော်မာ နီကတ်ကုန်ဧ့။ ထိုသာသနာတော်မာ နီထိုင်ကြကုန်ရေနတ်ရို့စွာ ကျွန်ုပ်တိကို အနာမဟိ ပကတိချမ်းသာအောင် အစိုင်မပြတ် စောင့်ရှောက်ကတ်ပါစီကုန်သတဲး။

၂၉။ သဗ္ဗီတိယော ဝိဝဇ္ဇန္တု၊ သောကော ရောဂေါ ဝိနဿတု။မာ တေ ဘဝန္တွန္တရာယာ၊ သုခီ ဒီဃာယုကော ဘဝ။

၂၉။ ဖီးရန် ခပ်သိမ်းကင်းစေကုန်သတဲး။ စိုးရိမ်ကြောင့်ကြ ကင်းစီကုန်သတဲး။ အနာရောဂါဟူသမျှ ပျောက်စီကုန်သတဲး။ သင့်အား အန္တရာယ် တစုံတရာမဖြိုက်စီသတဲး။ ချချမ်းသသာနန့် အသက်ရှည်စွာ နိန်ရပါစီသတဲး။

၃၀။ အဘိဝါဒနသီလိဿ၊ နိစ္စံ ဝုဍ္ဎာပစာယိနော။စတ္တာရော ဓမ္မာ ဝဍ္ဎန္တိ၊ အာယု ဝဏ္ဏော သုခံ ဗလံ။

၃ဝ။ ရတနာမြတ်သုံးပါးအား ရိုသေစွာ ဟိခိုးဆည်းကပ်လိ့ဟိရေသူ၊ သီလဟိသူ၊ သမာဓိဟိသူ၊ ပညာဟိသူတိကို အမြဲမပြတ်ရိုသေလေးစားတတ်သူစော် အသက်ရှည်ဧ့။ အဆင်းလှဧ့၊ ချမ်းသာကြီးပွားဧ့။ ခွန်အားဗလ တိုးတက်လေဧ့။ အသက်ရှည်ခြင်း၊ အဆင်းလှခြင်း၊ ချမ်းသာကြီးခြင်း၊ ခွန်အားကြီးခြင်းဆိုရေ ဒေကျေးဇူးတရားရို့စွာ ထိုပုဂ္ဂိုလ်အဖို့ ထာဝစိုင် တိုးတက်ပနာသာ နီကတ်ကုန်သတဲး။

အာဋာနာဋိယသုတ္တံ နိဋ္ဌိတံ

အာဋာနာဋိယသုတ် ပြီးပါဗျာလ်

နောက်ခံ

အာဋာနာဋိယသုတ်ဖြစ်ပေါ်လာပုံမှာ စတုမဟာရာဇ်နတ်မင်းကြီးလေးပါးစွာ အာဋာနာဋ ဟုခေါ်ဆိုသော နတ်မြို့တော်မာ စုရုံးစည်းဝီးကက်ကာ ဝိပဿီဘုရားမှစပြီးကေ ဂေါတမဘုရားအထိ ခုနှစ်ဆူသော ဘုရားသျှင်ကိုယ်တော်မြတ်ကြီးရို့ဧ့ ဂုဏ်တော်ကို အာရုံပြုပနာ ယှိခိုးပြီး အာဋာနာဋိယသုတ်ကို ဖွဲ့ဆိုခကတ်ရေ။ ယပြီးနောက်မှ ဘုရားသျှင်ဧ့ ဓမ္မစက်၊ ၎င်းရို့ဧ့ အာဏာစက်ကို မခံယူကြတေ နတ်ဆိုးတိကို အေပိုင် အေပိုင် နတ်ပြစ်ဒဏ်တိခတ်ဖို့ ဆိုကတ်ရေ။ ယင်းပိုင်ဆိုကတ်ပြီးနောက်မှရာ လူ့ပြည်က ဂေါတမ မြတ်စွာဘုရားသျှင်ဟိရာသို့ များပြားရေ နတ်စစ်သည်ဗိုပါတိနန့်အတူ လားခကတ်ရေ။

စတုမစွာရာဇ်နတ်မင်းကြီးလေးပါးစွာ လေးဘက်လေးတန်က မြို့တန်းခါးအတွင်း၊ အပြင်၊ အနီးရို့တွင် ၎င်းရို့ဧ့တပ်တိကို အစောင့်ချထားကြပြီးကေ ဂိဇ္ဈကုဋ်တောင်မာ သီတင်းသုံးနိန်တော်မူရေ ဂေါတမဗုဒ္ဓဟိရာသို့ ရောက်လာကတ်ရေ။ ဘုရားသျှင်ကို နှုတ်ဆက်ပြီးနောက် အခြားသော ယက္ခတိနန့်အတူထိုင်ကတ်ရေ။ ဝေဿဝဏ်နတ်မင်းခေါ် ကုဝေရနတ်မင်းက ဗုဒ္ဓဘုရားသျှင်ကို အေပိုင်ဆိုလီရေ။

"အသျှင်ဘုရား မြတ်စွာဘုရားအား မကြည်ညိုရေ တန်ခိုးကြီးရေ ဘီလူးရို့စွာ ဟိပါကုန်ဧ့၊ အသျှင်ဘုရား မြတ်စွာဘုရားအား ကြည်ညိုရေ တန်ခိုးကြီးရေ ဘီလူးရို့စွာ ဟိပါကုန်ဧ့၊ အသျှင် ဘုရား မြတ်စွာဘုရားအား မကြည်ညိုရေ တန်ခိုးအလတ်စားဟိရေ ဘီလူးရို့စွာ ဟိပါကုန်ဧ့၊ အသျှင် ဘုရား မြတ်စွာဘုရားအား ကြည်ညိုရေ တန်ခိုးအလတ်စားဟိရေ ဘီလူးရို့စွာ ဟိပါကုန်ဧ့၊ အသျှင်ဘုရား မြတ်စွာဘုရားအား မကြည်ညိုရေ တန်ခိုးအနိမ့်စားဟိရေ ဘီလူးရို့စွာ ဟိပါကုန်ဧ့၊ အသျှင်ဘုရား မြတ်စွာဘုရားအား ကြည်ညိုရေ တန်ခိုးအနိမ့်စားဟိရေ ဘီလူးရို့စွာ ဟိပါကုန်ဧ့။ အသျှင်ဘုရား အများအားဖြင့်က ဘီလူးရို့စွာ မြတ်စွာဘုရားအား မကြည်ညိုကတ်ပါကုန်။ ဇာကြောင့်ဆိုကေ မြတ်စွာဘုရားစွာ အသက်သတ်ခြင်းမှ ယှောင်ကြဉ်ခြင်းငှါ တရားကို ဟောတော်မူဧ့။ မပီးရေ ဥစ္စာကို ခိုးယူခြင်းမှ ယှောင်ကြဉ်ခြင်းငှါ တရားကို ဟောတော်မူဧ့။ ကာမဂုဏ်ရို့မာ မှားသောအားနန့် ကျင့်ခြင်းမှ ယှောင်ကြဉ်ခြင်းငှါ တရားကို ဟောတော်မူဧ့။ မဟုတ်မမှန်ရေ စကားကို ပြောခြင်းမှ ယှောင်ကြဉ်ခြင်းငှါ တရားကို ဟောတော်မူဧ့။ မူးယစ်မိန့်လျော့ကြောင်းဖြစ်သော သေအရက်ကို သောက်ခြင်းမှ ယှောင်ကြဉ်ခြင်းငှါ တရားကို ဟောတော်မူဧ့။ အသျှင်ဘုရား ဘီလူးရို့စွာ အများအားဖြင့်က အသက်သတ်ခြင်းမှ မယှောင်ကြဉ်ကက်ကုန်၊ မပီးရေ ဥစ္စာကို ခိုးယူခြင်းမှ မယှောင်ကြဉ်ကက်ကုန်၊ ကာမဂုဏ်ရို့မာ မှားသောအားနန့် ကျင့်ခြင်းမှ မယှောင် ကြဉ်ကက်ကုန်၊ မဟုတ်မမှန်သော စကားကိုပြောခြင်းမှ မယှောင်ကြဉ်ကက်ကုန်၊ မူးယစ်မိန့်လျော့ကြောင်း ဖြစ်သော သေအရက်ကို သောက်ခြင်းမှ မယှောင်ကြဉ်ကက်ကုန်၊ ထိုနတ်ဘီလူးရို့စွာ ထိုတရားတော်ကို မနှစ်သက် မမြတ်နိုးကတ်ပါ။

အသျှင်ဘုရား မြတ်စွာဘုရားဧ့ တပည့်ရို့စွာ အသံနည်းကုန်ရေ ပြည်ရွာတွန်သံ မဟိကုန်ရေ လူရို့ဧ့ အဖေသာ့အသက် ကင်းကုန်ရေ လူရို့ဧ့ လျှို့ဝှက်ရေ အမှုကို ပြုခြင်းငှါ ထိုက်ကုန်ရေ ကိန်း အောင်းပြီးကေ နိန်ခြင်းငှါ လျောက်ပတ်ကုန်ရေ ဝီးကွာရေ တောကျောင်းတိကို မှီဝဲနီထိုင်ပါကုန်ဧ့။ ထို ကျောင်းရို့မာ နိန်ရေ တန်ခိုးကြီးရေ ဘီလူးရို့စွာ ဟိပါကုန်ဧ့။ အကြင်ဘီလူးရို့စွာ မြတ်စွာ ဘုရားဧ့ သာသနာတော်မာ မကြည်ညိုကုန်၊ ထိုဘီလူးတိကို ကြည်ညိုစီဖို့ မြတ်စွာဘုရားစွာ အာဋာနာဋိယမည်ရေ ပရိတ်အရံအတားကို ရဟန်းယောက်ျား ရဟန်းမိမ ဥပါသကာယောက်ျား ဥပါသိကာ မိမရို့ဧ့ အကာအကွယ် အစောင့်အရှောက် ဖြစ်ခြင်းငှါ သင်ပီးတော်မူပါဖိဟု (လျှောက်ဧ့)။"

ယပြီးနောက် ဗုဒ္ဓဘုရားသျှင်က ထိုနတ်မင်းကြီးလေးပါးဧ့ ပြောဆိုမှု (တရားမန္တန်) ကို ရဟန်းရို့အား ပြန်လည်ဟောပြောပြရေ။ ဒေသုတ်ဧ့ နိဒါန်းမာ ဘုရားသျှင် ခုနှစ်ဆူရို့ဧ့ ဂုဏ်တော်တိကို ရွတ်ဆိုပူဇော်ဟိခိုးမှုများပါဝင်ပြီးကေ နတ်မင်းကြီးလေးပါးဧ့ ဂုဏ်အင်တိကိုလည်း ဖော်ပြထားရေ ယင်းချင့်အပြင် နတ်စစ်သည် (၄၁) ပါးရို့ဧ့ နာမည်တိကိုလည်း ဖော်ပြထားသေးဧ့။

အာဋာနာဋိယသုတ်ဧ့ အကျိုး

ဒေသုတ်ကို မပြတ်ရွတ်ပီးကေ နတ်ရို့က လိုလားရေ၊ နတ်လိုက လူလို၊ လူလိုက ဂြိုလ်မ၊ ကံဇာတာ ထလာစီနိုင်ရေ စုန်းပယောဂ တစ္ဆေ၊ မြီဘုတ် ပူးကပ်ကေ ဒေသုတ်နန့် ထုတ်ပစ်နိုင်ရေ။ ပယောဂ ခွာဆီးတမျိုး ဖြစ်လီရေ။ ဒေသုတ်ကို ရွတ်ပီးကေ လူနာကို အပ မမှီနိုင်ပေ။

ကိုးကား

၁။ Walshe၊ Maurice (1995)။ The Long Discourses of the Buddha: A Translation of the Digha Nikaya။ Wisdom Publications။ pp. 471–478။

၂။ Atanatiya Sutta: Discourse on Atanatiya။ Buddhist Publication Society (1999)။

၃။ ပါဠိစာပီသမိုင်း။ ဒေါ်အုန်း မစွာဝိဇ္ဇာ။ ဒုကြိမ်၊ ဂျန်နဝါရီလ ၁၉၈၁။ သာသနာရီးဦးစီးဌာန။ ရန်ကုန်။

၄။ တိပိဋကဆရာတော် ဦးဝိစိတ္တဿရာဘိဝံသ (၁၉၉၇)။ နိုင်ငံတော် သာသန မဟာဗုဒ္ဓဝင် (တတိယတွဲ)၊ သတ္တမအကြိမ်။ သာသနာရီးဦးစီးဌာန။ p. ၃၁၇။

၅။ Atanatiya-sutta, Ātānātiya-sutta, Āṭānāṭiya-sutta: 1 definition (12 September, 2019)။